Friday, August 31, 2007

مرحب شهر الصوم ......مرحب


اخوتى واخواتى فى الله
السلام عليكم ورحمة الله وبركاتة............اما بعد
كل عام وانتم بخير وصحة وعافيةبمناسبة قدوم شهر رمضان المعظم ...اعاده الله علينا وعليكم بالخير واليمن والبركات اعواماعديدة ان شاء الله...واكرمنا الله ومن علينا بصالح الاعمال التى ترضيه عنا باذن الله..................اما بعد
.......نخش فى الموضوع
شوفوا بقة ..احنا عاوزين نتفق على جدول رمضانى جميل ونساعد بعض على القيام بية...ونحدد ده فى نقط معينه عشان العملية ما توسعش مننا والموضوع يتوه ونلاقى نفسنا فى الاخر مش لاقيين وقت نعمل حاجة والشهر جرى بسرعة كعادتة...ونبص نلاقيهم بيغنوا لنا فى التليفزيون....هل البدر بدرى..والايام بتجرى والله لسة بدرى والله يا شهر الصيام....ويقعد جسمنا يقشعر ونعيط ونقول يا ريت نلحق نخلص اى حاجة من اللى كان نفسنا نعملها....شوفوا بقة
نبدأ اليوم من اوله بصلاة الفجر واذكار الصباح..و5صفحات قرآن
لما نصحى ان شاء الله نصلى الضحى..ثم الظهرمع السنة..طبعا عارفين فضل الصلاه فى رمضان وازاى الحسنات بتتضاعف
طبعا الفترة دى بتختلف من طلاب لموظفين لربات بيوت المهم اللى يقدر يقرا كمان شوية قرآن يبقى زى الفل
طبعا من صلاة العصر وحتى المغرب الرجالة مطلعة عين ا....ستاتها عشان الاكل والسجاير والذى من ...لذا انصحك بالاختفاء الساعتين دول فى المطبخ....ويا سلام طول ما انتى واقفة ترطبى لسانك بذكر الله....يا سلام الاكل كدة هيطلع مية مية
طبعا تيجى ساعة الفطار....وساعة البطون تتوه العقول انا معاكم...بس لو تمرتين ونصلى الفرض والسنة.....يبقى ميت فل و14 طبعا معروف ان الرجاله بيصلوا فى المسجد والستات فيييين....فى البيوت ما عدا القيام انتوا احرار
خلصنا بقة اكل وشرب وحلويات وشفنابرنامجين كدة واحنا عالاكل دمهم خفيف.....نقوم بقى نصلى العشاء بالسنن طبعاونكمل بقة ورد القرآن اللى احنا بدأناه الصبح ونصلى بقة القيام ونقعد نذكر الله كثيرا
بالنوسبةللمسلسلات واللى بالك فية كلة بيتعاد تانى بعد العيد على مدار السنة....نلحق احنا وقتنا واوكازيون الحسنات ده وناخد اللى ربنا يقدرنا علية وما ننساش ندعى لبعض وندعى لموتاناونطلع كل يوم حاجة لله فلوس...ملابس.,.اى حاجة
بس دة طبعا غير الاطعاااام اللى هو افطار الصائمين اللى عندها وقت وجهد تعمل بنفسها...ما عندهاشفى متبرعات يعملوا ده لوجه الله ماكانش نعمل شنط ونوزعها...ونفكر بعض يا جماعة
الى ربات البيوت
كام نصيحة صغنونة واكيد انتى عارفاهم ..بس ادينا بنفتكر سوا
قبل رمضان قومى بتجهيز الآتى..عشان توفر عليكى مجهود الصيام
قطعى التمر بكميةكافية تريحك طول الشهر وحطية فى علبة محكمة الغلق
اعملى برطمان للمكسرات وجوز الهندوالزبيب يكون جاهز للحشو واقفلية كويس
اعملى شفشق شربات كبير ينفعك فترة طويلة
حضرى شوية خضار مقطع فى الفريزر
اعملى شوية عصاج..وصبعى شوية كفتى..وتبلى شوية صدور فيلية وحضريها بالبيض والبقسماط تبقى جاهزة ع التحمير
كدة ممكطن يبقى عندنا شوية وقت بالنهار...نعرف نسبح ونقرا قرآن
ابعدى عن الخلافات الزوجية عشان ما يضربولناش الشهر يا اختشى
وفى الدراسةربنا يعيننا جميعا ع الولاد والبيت والبيةو الصيام
آسفة جدااااا ع التطويل من عشمى والله
ونتقابل على خير
ومرحب شهر الصوم .....مرحب-

27 comments:

عصفور المدينة said...

مساء الفل
والسلام عليكم ورحمة الله وبركاته

وربنا يكرمك ويبارك فيك وإيه الجدول العملي ده والله فعلا مفيد جدا وخاصة الأشياء التي توفر الوقت ينبغي فيها الابتكار فعلا لازم ندور على الوقت بيتسرب فين ونسد الفتحات دي
ربنا يبارك في جهدك

admelmasry said...

كل سنه وانتي طيبة
رمضان كريم

sa7arkash said...

عصفور المدينة
يا سيدى ربنا يخليك..ويبارك لنا فيك

ودعواتك بقة انة ما يبقاش كلام وبس....وربنا يعيننا ع التنفيذ
بجد والله احنا محتاجين دعوات بعض بالتثبيت....ربنا يثبتنا جميعا ان شاء الله

sa7arkash said...

آدم
حمد الله ع السلامة من الخارج يا سيدى

وكل سنة وانت طيب والله اكرم

القلم السكندري said...

جزاكم الله خيرا يا سحر علي الجدول المفيد ده

وأحب أضيف..

الأهم من كم القرآن المقروء في رمضان هو كيفية التلاوة

تلاوة بتدبر

بتفهم للمعاني

لو كل واحد فينا مر علي آية آية يحاول يفهمها ومعاه كتاب كلمات القرآن (وده كتاب جيب صغير جدا للشيخ حسنين مخلوف )

هنلاقي نفسنا بنقرأ آيات كأننا اول مرة نقرأها

هتفرق معانا في حاجات كتير اوي

وهنحس اد ايه كنا بعيد عن ديننا ومفرطين فيه

ياريت فعلا تبقي دعوة للتدبر

وربنا يتقبل منا ومنكم

ولك موفور التحية

فى القلب said...

واللهى يا سوسو
بعد ما قرأت البوست ده
حسيت كده بالخير
مش خير الثوابات
لاءءءءءءءءء
حسيت باخير بيسرى و يمرى عليا كده
وحسيت أنى ربربت شويه كده
ويعنى أفتكرت فضله خيرك عليا يا قمر
والغذا ألى من أيدك
يا أجدع نفس فى الأكل أبلته فى حياااااااااتى
يا قمر

ويارب ديماً يجعله عااااااااامر
أفطر الله عندكم الصائمون
وأكل طعامكم الأبرار

sa7arkash said...

يا اسكندرانى
.
.
متشكرة جدا على الاضافة الهايلة دى..وجزاك الله كل خير

ولا تنسى الدعاء للكل
واشكرك على مرورك الدائم

sa7arkash said...

اوووووووووووووشا
ابلفينى يا بت ابلفى.

ما انا قلت لك بلاش انا؟؟
تعالى انت يا قمر وانويها ومالكيش دعوة
هظبطك تظبيطة عاااال
واعمل لك منيو ما حصلش


بس المهم ما نعملش زى كل مرة ونشبع من واحنا فى المطبخ..وما نعرفش نكمل

Doaa Ebrahim Aaql said...

كل سنة وانتى طيبة ياجميله

وايه الجو الرمضانى الرائع اللى فى البوست ده

يارب يبلغنا رمضان بخير

وكل سنه وانتى طيبة تانى يا قمر

sa7arkash said...

دودو الشقية
واننى طيبة يا جميلة
ده اول رمضان علينا..ويا رب دايما مع بعض ع الخير....انا سمعت من اوشا انك سكر....عامة دة واضح من الكلام اللى بتكتبيه.....................وانا سعيده بمعرفتكم جدا



كل سنه وانتى طيبة يا حبيبتى

momken said...

كل سنه وانتى طيبه اوى اوى

تحياتى

semsem said...

مساء الخير

كل سنه وانت طيب بعوده الايام

جزالك الله خير وبلغنا واياك الشهر الكريم

sa7arkash said...

ممكن
.
وانت طيب يا سيدى..ونورت البلوج
ويا ريت تشرفنا دايما بالزياره

sa7arkash said...

semsem
.

مساء الفل يا جميل
وانتى طيبة يا قمر
نورتى المدونة..وانا كمان زورتك وتركت لكى تعليق على فنك الجميل

Unknown said...

كل رمضان و انتى و كل اسرتك فى احسن صحة و حال
وجزاكى الله كل خير على الخير اللى مليان بيه قلبك و كترى من الكنافة بالكريمة من فضلك

sa7arkash said...

وانت طيب يا سيد الكل
وآمين آمين آمين
ومتشكرة يا سيدى ع الكلام التحفة ده

اما بخصوص الكنافة...انت تأمر يا سيدى واحنا نعمل ...سمعا وطاعة
خلى رمضان يعدى على خير



بس على الله يتمر

horas said...

كل سنة وانتى طيبه يا سحورة
ويا رب يكون احلى رمضان عليكى
ومتزعليش منى
انا جيت اهو

rack-yourminds said...

بارك الله فيكي وكل سنه وانتي طيبه

صاحب البوابــة said...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

صانعة الحرية said...

السلام عليكم
جزاكم الله خيرا وربنا يجعله فى ميزان حسنات حضرتك
ثانيا
ادعوكم للمشاركه فى حملة
معا من اجل الحريه للمعتقلين
http://sona3al7iah.blogspot.com/2007/09/blog-post_08.html

احساس لسه حى said...

عزيزتى
وعليكم السلام
ودايمن نتمنا نعمل حاجات كتيره اوى قبل رمضان
ولما يبتدى نكون نشاطين فى عملها بس مع كل يوم الحماس بيقل
مع ان اللى بيتعمل علشان اخرتنا هو بس اللى باقى
الانسان كائن غبى ودايمن بيبوص تحت رجليه
ربنا يغفر للجميع
نصيحك معظمها حريمى
ربنا يكرمك ويديكى على اد نيتك واعمالك ويرحمك
بدعيلك اهو ادعلنا بقه
تحياتى
سلام

sa7arkash said...

حورس

وانت طيب يا ...وان شاء الله يكون جميل علينا جميعا يا رب

ونورت ياسيدى..ويالا عفوناعنك ومش زعلانة ...بس اى تاخير بعد كده...ها

برضة مش هزعل

sa7arkash said...

wahed>>>
وانت طيب وربنا يجمعنا ع الخير دايما

ونورت..وفرصة سعيدة جدا

sa7arkash said...

صاحب البوابة

اشكرك على الزيارة..وعلى التعليق الرائع ده....وكل سنة وحضرتك طيب

وربنا يرزقناالصيام الحقيقى والصلاة بخشوع وقراءة القرأن بتدبر وقيام
الليل بدون فتور طيلة الشهر الكريم

آميييييييييين
يا رب العالمين

sa7arkash said...

صانعة الحرية

اشكرك بشدة على الزيارة والتعليق
واشكرك على الدعوة لهذه الحملة..واكيد انا معاكم

نورتينى

sa7arkash said...

احساس لسة حى

شرفتنى بالزيارة
وعندك حق احنا فعلا بنبدا حاميين جدا....وبعدين بنفتر مع الايام...عشان كدة عاوزين نذكر بعض ونعمل شحن دورى لبطاريات قلوبنا وربنا يساعدنا
وربنا يصلح حالك ويرزقك رمضان كلة خيروصلاح وتقى..
آدينى دعيت اهه

ياريت ندعى لبعض طول الشهر
ويارب ربنا يستجيب

malak said...

رمضان كريم وكل سنة وانت طيب
تحياتى