Wednesday, August 15, 2007

ازف اليكم النبا التالى

مساء الخير يا حلوين.........يا مأطأطين........يا مسكرين ........ياجميلين
النهاردة يا ولاد هتكلم معاكم فى موضوع ما يخصكوش خالص..تماما البتة....بس يخصنى وبشدة وبعنف ويهمنى اهمية قصوى.......فالفاضى يتفضل منورنا والمشغول الله يعينة وهندعى لة......ومنورنا برضة..وفى قول آخر برضك....هك هك هك .........طبعا زهقتوا م المقدمة....نخش فى الموضوع



احب ازف اليكم هذا النبأ الهااااام جدا .......امبارح كان عيد جوازى العاشر.....تتصورا....عشر سنين يا ولاد...اية اللطافة دى...ما طلع الجواز حاجة سهلة اهة...دى وصفة سهلة دى وصفة هايلة.....وبعدين عاوزة اقول لكم مافيش ابسط من كدة....اية يعنى كام يوم عكننة كل اسبوع ,,,قصدىكل شهر......واية يعنى خناقة كل يوم يييييييه قصدى كل شهر برضه.......يا جماعة الخلاف فى الرأى لا يفسد للود قضية.....وبعدين يعنى مجموع فترات الخلاف دى كلها تعمل لها حتة بكام يعنى......يعنى هنقول 7 و5 ومعانا الواحد من اصل عشرة .....طيب سهلة خالص ......يعنى لو عرفت تتحصل على عشر شهور صافى من غير مناور ولا بروزات...فى عشر سنين يبقى كتر خير الدنيا


بجد يا جماعة نتكلم بجد بس اللى مش متجوزين يطلعوا برة عشان ما نشيلش ذنبهم...قصدى عشان هنتكلم كلام كبار.....طبعا كلة هيقعد ويبرق عنية.........فهمتوا غلط يا.....قصدى كلام كبار وعاقلين..
دلوقتى اية مشكلة الجواز ...عند المتجوزين مش اللى ناويين عشان مانخشش فى شقة وشبكة ومهر وكلام فاضى من دة.....
احنا خلينا فى اللى اتنيلوا ....قصدى اتجوزوا بالفعل... نفسى اعرف اية المشكلة سواء حريمى او رجالى....بس بموضوعية ياجماعة يعنى ما تجيش واحدة تقولى شغل البيت..لا العيال والجرى وراهم طول النهار واسكت يا واد واكتمى يا بت.....ولا المطبخ ما بيخلصش ابدا هو انا اية قاعدة فى معسكر.......ولا تشطيب الحوض والحلل وخفة دمها........ولا تفترى ع الراجل وتقول دة ما بيقوليش كام حب ...دة ما بيفسحنيش لوحدنا ابدا....دة عمرة ما دخل عليا بهدية(الشر برة وبعيد عن السامعين


يجى بقة راجل سطحى...وغير موضوعى يقولك شكلها اتغير لأ تخنت لا مااعرفش احولت......لا البيت مبهدل لا العيال عاملة دوشة...لا والتفاهة كلها بقة لما يقولك...المصاريف لا المدارس....لا ما اعرفش الدروس الخصوصية... المصايف المشاتى.....مش عارف اخرج مع اصحابى.... لأ اكل امى وحشنى اصل امى كانت بتعمل وبتسوى....وفى الحالة دى انصحك عزيزتى بهاند باج صغنونة ...ولا اقولك كيس اسود من بتاع ال...ولمى لة فيى حاجتة وابقى خلى ام......تربى لة العيال ......وعشان نقول كلمة حق انت كمان عزيزى الزوج.....تقولك بابا كان بيعمل بابا كان بيجيب....نفس الرول اللى احنا لسة قاطعين منة كيس حالا وخليها هى تلم حاجتها لان انت عارف الستات ليها رفايع كتير.......وخلى بابا بتاعها يساعد ماما بتاعتة ويربوا العيال


ارجع واقول بجد والله انا سعيدة جدا وحاسة انى عملت انجاز...عشر سنين جواز...يا جمالة...مع ان انا فاكرة ان اخويا يوم فرحى قال لخطيبى على اعتبار ما قد كان...انا مديك حاجة...ولا كلمة..وبعدين ضمان 3 سنين صيانة وقطع غيار....بس الحمد لله ما كلفتهمش من يومها كدة ولا كدة...لسة زيرو وبحالة الفابريقة...
بس بجد بجد الا يعنى هو كدة تبقى التجربة نجحت ولا الكلام دة بعد كام سنة بالظبط افيدونا افادكم الله....وعقبال عندكم...

11 comments:

عصفور المدينة said...

أول أمس احنا 14 سنة
شدي حيلك

فى القلب said...

أول حاجه
كل سنه وأنتو طيبين
وديما يا رب مع بعض


بالنسبه لواقع تجربتى السنه13 بتبقى أروع سنه
بس الحمد الله كلها شهرين تلاته وتخلص
وأحنا حاطين أملنا على السنه 14 وأكيد أنتى أول واحده هتعرفى

مره تانيه كل سنه وانتو طيبين

princess dodo said...

كل سنة وانتى طيبه ياقمر
أنا مبسوطه اووووى من الكلام اللى قلتيه
وبرغم ان انا مش متجوزه بس مسمعتش كلامك
وكملت البوست للآخر
هههههههه
طبعا دى تجربه ناجحه بجد
وربنا يحفظكم يارب ويهدى لك بالك

وعقبالى يارب

عقبــــــــالى

ههههههههه

كل سنه وانتى طيبه وسعيده يارب

sa7arkash said...

اوشا
وحشتينى يا قمر انتى فين
مش عاوزة اقول لك انا كنت فين لمدة 5 ايام عشان ما اتشتمش ع الهوا
وبعدين لسة 5 شهور فى السنة ال13 خليكى متفائلة


جايز اللى جاى يعدل اللى فات
وما اتحرمش يا جميل

sa7arkash said...

دودو
وانتى طيبة يا قمر
وان شاالله عقبالك...وتشوفى الانبساط على الطبيعة...مش قراءات...
وما تخافيش
الرب واحد والعمر واحد
توكلى على الله...وخشى برجلك اليمين

sa7arkash said...

عصفور المدينة
تانى مرة ارد مش عارفة هيظهر ول لا
منورنا
والشدة على الله..وقلبى عندك
هيييييييييييييييييييييه ............دنيا

New Image said...

طبعا انا كنت عارف الميعاد لوحدى و الحمد لله ، ايه رأيك مش جوز مثالى ولا ايـــه

New Image said...

على فكرة انا باعترف انى حظى ف حياتى الزوجية عظيم ده صحيح ربنا يقدرنى و أقدر اوصل لك الاحساس ده عندك انتى كمان ، عشان احس انى عملت ليك حاجة كويسة

sa7arkash said...

new image
يا حركاته...
يا اخويا ما انا قاعدة جنبك...لازم تسيح لى ع الفضائيات

وبعدين عندك كلمة حلوة ...
تقدر تقولها وما تخافش مش هقول لبابايا
سرك فى بييييير
نورت يا جميل

david santos said...

I passed to congratulate it with its work and to desire a good August to it in vacation.

القلم السكندري said...

أولا ...

كل سنة وانتي طيبة


ثانيا..

عقدتينا في عيشتنا خلاص

وربنا يصبرك وتكملي اربع تأبيدات جواز

يعني اقصد عقبال 100 سنة