Saturday, November 10, 2007

خريف..شتا..ربيع..صيف


دى المراحل اللى بتمر بيها السنة......طبعا..كل سنة

وده ترتيبهم الزمن..وما ينفعش فصل يسبق التانى...ولا فصل يلغى التانى...........لوبصينا شوية فى معانى الفصول دى..وحاولنا نطبقها على حياتنا....هنلاقى الآتى ودة طبعا من منظورى الخاص...ولكل منا منظور خاص به .

.

.يعنى انا شايفة مثلا ان العمر بيبدأ بالربيع... وهى دى اجمل فترة الطفولة البراءة الانطلاق عدم تحمل المسؤلية الضحكة من القلب العيون الممتلئة تفاؤل......ربيع بجد


طيب وبعد كدة...انا شايفة انه الصيف...ودى ما بعد الطفولة وهى المراهقة وبدايات الشباب...وشايفة ان الصيف شبهها قوى...حر يتماشى مع حريتهم ورغبتهم فى كسر القيود.....خروج سهر فسح وحب وصداقة...ودى كل متطلباتهم


اما بعد كدة فحسيت بحيرة..الخريف ولا الشتا بس انا شفت انة الشتا...وهو نهايات الشباب والكهولة...تحس فيها بالبرودة واحتياجك للدفء دفء حقيقى دفءالحب الاحتواء الاستقرار دفء العشرة الحلوة دفء جنى ثمار المرحلة اللى فاتت......مرحلة بنكن فيهاشوية زى الشتا مش ملهوفين اوى على الخروج حلو الدفا والسرير والبطانية حلوة القراءة بس الامر ما يستغناش فسحة حلوة كل فترة كدة خروجةلطيفة شوية عواطف تدفى الجو


اما الخريف...فأنا شايفاة ما بعد ذلك ورق بيتساقط شجر بيذبل...وبرضة شعر وأسنان بيتساقطو ووجة بيذبل جو بتزحف فية الكآبة والانقباض على سائر المشاعر دون سبب ..كذلك تجاعيد فى المشاعر تجاعيد فى الداخل والخارج ....وساعتها بنكن رغما عنا وليس بارادتنا


وزى ما قلت قبل كدة...بين الفصول مافيش فصل بيسبق فصل ولا بيلغية

بس انا شايفة ان فصولنا احنا بتسبق بعض وبتلغى بعض وبتتجاوز بعض...يعنى مش الكل عاش ربيع كامل....ولا عاش الصيف زى ما كان نفسة....وفى اللى دمج الربيع والصيف ..وعاش شتا اطول...وفينااللى حاسس بالخريف وهو فى عز الصيف...وفينا اللى فى الخريف....وقلبة ومشاعرة ربيع وصيف....دة رأى مش عارفة رأيكم اية

Sunday, October 28, 2007

وماتت....عشقا



حنين.....اشتياق.....حب.....سهر.....حلم.....دموع.....خصام.....حيرة.....صلح......فراق.....رجوع.....قلب.....حضن.....حضن.....حضن



بحبك...وحشتينى..نفسى اشوفك..ماقدرش اعيش من غيرك..اوعى تبعدى عنى..اوعى تسيبينى..انتى احلى واحدة فى عينى ..بموت من الغيرة وانتى بعيد عنى...هااعيش احبك اعيش احبك..واموت احبك اموت احبك



نفسى اسمع الكلام دة..واحس المشاعر دى تانى...نفسى اعيش كل مشاعر الحب...تانى



كل هذة الكلمات قالتها والدموع تغمر وجهها...ولم تجد غير كفيهاالمنهكتان حتى تحتضنا هذا الوجة الذابل......ولم يكلف هو نفسة عناء السؤال عن اسباب هذة السيول من الدموع.......ولكنة اكتفى بالنظر اليها فى تعجب مفتعل ومتعمد.....وابتسم ابتسامة ذابلة ثم اشاح بوجهه



بعيدا....كانما اراد ان يقول لها لا تنتظرى منى اى مظهر من مظاهرالاحتواء...ولا التعاطف...ولاادنى مظاهرالتفاعل



وكم كانت تتمنى ان يأخذها بين ذراعية ويحتضنها ويغمرها بقبلاتة..ويمسح عن وجنتيها تلك الدموع ....ويمسح عن قلبها تلك الجروح






كانت تتمنى وتتمنى وتتمنى........وكان يبعد ويبعد ويبعد



وقتل فيها كل المشاعر....وماتت...



فقد كانت ما هى الا كتلة من المشاعر




اشتقت اليك فعلمنى الا اشتاق...علمنى كيف اقص جذور هواك من الاعماق

Monday, October 22, 2007

يالا.....مش خسارة فيكم........بس بجد تحفة


شعر الرئيس.. إهداء إلى شعب

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان ماتش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

تبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وادلع اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال

منقوووووووول

Thursday, October 18, 2007

وحشتوووووووووووونى.........موووووت

وحشتونى..وحشتونى..وحشتونى
بجد والله وحشتونى جدا جدا جدا...ومتشكرة جدا لكل واحد سأل عليا طول فترة غيابى اشكركم للمرور واشكركم للمتابعة واشكركم للاهتمام.......وان شا الله ما اتحرم منكم بجد افتقدت كل الأصدقاء..اشعارهم الجميلة..مواضيعهم الانسانية..تهكماتهم السياسية...كلامهم فى الحب ... كلامهم فى الدين ونصايحهم الغالية.....تعليقاتهم عندى وعند بعض.... بجد كلكم وحشتونى وافتقدتكم كلكم حتى اللى ما حسش بغيابى..والله افتقدت الجميع اما سبب تأخرى عنكم هذة الفترة هو انى أخذت عهد على نفسى طيلة رمضان ما افتحش النت خاااالص..وكنت بفكر فى الكل واسال يا ترى فلان عمل اية ...وفلانة الرقيقة كتبت اية..بس مسكت نفسى عشان العهد اللى أخدتة لنهاية رمضان...وربنا يتقبل مننا جميعا...وعيد سعيد ع الكل وتابعت شوية من اصدقائنا الغاليين ولسسة هكمل الباقى.........واقول لكم تانى ...بجد وحشتونى..وحشتونى



Sunday, September 9, 2007

الحاجة.....شقة

ردا على اوشا الجميلة..حبيبتى وحببتنا جميعا ......احكى لكم اللى حصل معانا فى الويك اند اللى فات.....على اعتبار ان دايما فى ويك اند وناس بقى عايشة وبتستمتع بحياتها كركركركرككر ههههههههه

المهم ما اطولش عليكم...ونخش فى الموضوع
والكلام ليكى يا ست اوشة..........بقى كدة يا اوشا تفضحينى على الفضائيات والقنوات المفتوحة والاقمار الصناعية والطبيعية.........ما كانتش يعنى غدواية فى احلى حتة فى الكاهرة....على احلى كام حتة كيك........على كوبايتين شاى..........على آيس كريم.......على على على على


وبعدين انا يا ظالمة عايزة المتر ب100 جنى يا ضلالية...انا قلت انا معاكم ل300 جنى.......يعنى ولا فى دماغى ولا بيهمنى...نزيهه وسى الافندى بتاعى نزيه وبنحب نعيش..........وكان فى مثل بيقول ينعل ابو القرش اللى ما ينزه صاحبه........بس انا مقتنعة باللى بيقول ينعل ابو القرش لابو صاحبة........انا سبق وكتبت بوست قبل كده عن الموضوع ده....اللى هو الشقق والاسعار والذى منة بس مش دة موضوعى دلوقتى...................انا فى اوشا اللى شهرت بيا وفضحتنى انا وسى الافندى بتاعى وبعدين هو ده لف...ده احنا لسه بنقول يا هادى...وانا وراها والزمن طويل........مش اوشا طبعا ....الشقة

اما اوشا حبيبة قلبى...فهى نعم الصديكة الصدوكة
مانتحرمش يا اوشا ابدااااا...واجمدى كدة...وصدقينى المستقبل كلة للصحارى والعفاريت....قصدى للمدن الجديدة....الشديدة..
وانا عند وعدى بالخاتم الماس.......ده غير الوعد التانى اللى انتى عارفاة لو كسبت 5 مليون جنية....ليكى منى خاتمين فضة..وآروصة سجاير للافندى بتاعك...وعجلة غاااالية من امه 250 جنية للاولاد....اما بنوتتنا الغالية ياسمين فانتى عارفة هجيب لها اية....ولا اقووووول........ماهو الو......فيه اللى او.....منه
بحبك يا اوشا...وتانى مرة مش عايزيين تسييح على الهوا

Friday, August 31, 2007

مرحب شهر الصوم ......مرحب


اخوتى واخواتى فى الله
السلام عليكم ورحمة الله وبركاتة............اما بعد
كل عام وانتم بخير وصحة وعافيةبمناسبة قدوم شهر رمضان المعظم ...اعاده الله علينا وعليكم بالخير واليمن والبركات اعواماعديدة ان شاء الله...واكرمنا الله ومن علينا بصالح الاعمال التى ترضيه عنا باذن الله..................اما بعد
.......نخش فى الموضوع
شوفوا بقة ..احنا عاوزين نتفق على جدول رمضانى جميل ونساعد بعض على القيام بية...ونحدد ده فى نقط معينه عشان العملية ما توسعش مننا والموضوع يتوه ونلاقى نفسنا فى الاخر مش لاقيين وقت نعمل حاجة والشهر جرى بسرعة كعادتة...ونبص نلاقيهم بيغنوا لنا فى التليفزيون....هل البدر بدرى..والايام بتجرى والله لسة بدرى والله يا شهر الصيام....ويقعد جسمنا يقشعر ونعيط ونقول يا ريت نلحق نخلص اى حاجة من اللى كان نفسنا نعملها....شوفوا بقة
نبدأ اليوم من اوله بصلاة الفجر واذكار الصباح..و5صفحات قرآن
لما نصحى ان شاء الله نصلى الضحى..ثم الظهرمع السنة..طبعا عارفين فضل الصلاه فى رمضان وازاى الحسنات بتتضاعف
طبعا الفترة دى بتختلف من طلاب لموظفين لربات بيوت المهم اللى يقدر يقرا كمان شوية قرآن يبقى زى الفل
طبعا من صلاة العصر وحتى المغرب الرجالة مطلعة عين ا....ستاتها عشان الاكل والسجاير والذى من ...لذا انصحك بالاختفاء الساعتين دول فى المطبخ....ويا سلام طول ما انتى واقفة ترطبى لسانك بذكر الله....يا سلام الاكل كدة هيطلع مية مية
طبعا تيجى ساعة الفطار....وساعة البطون تتوه العقول انا معاكم...بس لو تمرتين ونصلى الفرض والسنة.....يبقى ميت فل و14 طبعا معروف ان الرجاله بيصلوا فى المسجد والستات فيييين....فى البيوت ما عدا القيام انتوا احرار
خلصنا بقة اكل وشرب وحلويات وشفنابرنامجين كدة واحنا عالاكل دمهم خفيف.....نقوم بقى نصلى العشاء بالسنن طبعاونكمل بقة ورد القرآن اللى احنا بدأناه الصبح ونصلى بقة القيام ونقعد نذكر الله كثيرا
بالنوسبةللمسلسلات واللى بالك فية كلة بيتعاد تانى بعد العيد على مدار السنة....نلحق احنا وقتنا واوكازيون الحسنات ده وناخد اللى ربنا يقدرنا علية وما ننساش ندعى لبعض وندعى لموتاناونطلع كل يوم حاجة لله فلوس...ملابس.,.اى حاجة
بس دة طبعا غير الاطعاااام اللى هو افطار الصائمين اللى عندها وقت وجهد تعمل بنفسها...ما عندهاشفى متبرعات يعملوا ده لوجه الله ماكانش نعمل شنط ونوزعها...ونفكر بعض يا جماعة
الى ربات البيوت
كام نصيحة صغنونة واكيد انتى عارفاهم ..بس ادينا بنفتكر سوا
قبل رمضان قومى بتجهيز الآتى..عشان توفر عليكى مجهود الصيام
قطعى التمر بكميةكافية تريحك طول الشهر وحطية فى علبة محكمة الغلق
اعملى برطمان للمكسرات وجوز الهندوالزبيب يكون جاهز للحشو واقفلية كويس
اعملى شفشق شربات كبير ينفعك فترة طويلة
حضرى شوية خضار مقطع فى الفريزر
اعملى شوية عصاج..وصبعى شوية كفتى..وتبلى شوية صدور فيلية وحضريها بالبيض والبقسماط تبقى جاهزة ع التحمير
كدة ممكطن يبقى عندنا شوية وقت بالنهار...نعرف نسبح ونقرا قرآن
ابعدى عن الخلافات الزوجية عشان ما يضربولناش الشهر يا اختشى
وفى الدراسةربنا يعيننا جميعا ع الولاد والبيت والبيةو الصيام
آسفة جدااااا ع التطويل من عشمى والله
ونتقابل على خير
ومرحب شهر الصوم .....مرحب-

Thursday, August 23, 2007

AHHHHHHHHHHHHHHAT



كان ياما كان فى سالف العصر والاوآن.....

بنوتة حلوة زى القمر...واسمها يا سيدى كان...قمر

وولد شجاع وبطل..وبيحب الحلوة قمر..واسمه كمان كان ...عمر

وفضلوا الولاد يحبوا بعض من وهما نونوهات وفى كيجيهات...لغاية

لما كبروا ودخلوا كمان الجامعات

قال عمر انا عاوز اكون فى يوم طبيب...قالت قمر يا ريت..وانا هدخل حاجة

سهلة عشان اتفرغ للحبيب

كبروا الولاد واتخرجوا بعد سنين الضنا والعداب...هو طبيب..وهى واخدة

م الشهادات ادآب

فاتت سنة.......وماله

وفااااتت سنييييين

وماله

يعنى ما هو اللى صبرهم من كيجيهات.....قادر يصبرهم كمان شوية ....

سنواااااااات

ام قمر قلقت قوى وطلبت عمر.....جرى ايه يا دكتورنا الكبير....فاتت سنه

ووراها اهه سنوات كتير...وكبرت يا ابنى وخدت م الشهادات كتير.......

اشى دبلومات....وماجيستيرات....ودكتورات

ولسه البت قاعدة جنبى...دى مش بس فاتها قطر الجواز...لا...فاتها كمان

قطر الخلف..وانا مخى يا ابنى داخل على مرحلة التلف

وضحك عمر ضحكة طويييييييييييييييلة

وقال لها...سنوات كتير شهادات كتير...شهادات كتير سنوات كتير

وفضل يعيد ويزيد ما قطعش صوت د\عمر....غير لما وصلت بطلتنا الحلوة

قمر

وسكت خااااالص ولا قال لها ولا عاد لها...وفى البكا فجأة انهمر

ولا سألتة ولا عاتبته...ومن عنيها سيل دموع تانى انهمر

وف ايدهم ايه تانى يعملوه..غير الدموع

هى الضلمه الكحل دى...ممكن تنورها الشموع

بعد كل العمر ده..لاعلم نافع..ولاطب شافع....ولا حتى حب.....

لا الشقة جت..ولا حتى شبكه..ولا عياده..ولاولاولا

ولابعد ميت مليون سنة

يا جماعه احنا بنتظلم.... وبنتنفى جوه الوطن

احلامنا منا بتتسرق....وماضينا كله بيتحرق

اصل احنا جيل....لاشاف له ماضى..ولاتراث

ولا عاش له حاضر......ولا له ميراث

لا عرفنا نبكى على اللى فات....ولا نحكى دكرى عن اللى مات

ولا يوم هيعرف حد يحكى عننا.......اى حكايات

لاماضى عشنا...ولا حتى حاضر

اما اللى جاى مش لينا احنا..ده لل.......ده للدايما بنقوله حاااضر

ومش آهه واحده..لآ دى كتير آهاااااااات

ورقصنا يا جدع على اللى جاى بكرة وآآآآآآآآت

Saturday, August 18, 2007

شششششششششششششششششششششششش


اماااااااااااان......
........اية؟؟؟؟

بقول اماااااااااااااااااااان.............انت اية ما بتسمعش؟
لا بسمع والله بس مش فاهم..هو انت تقصد ايه

اقصد ايه...ايه يا ابنى هو انت منين...الامان ده ابسط حقوق الانسان

حقوق.....تانى هتقول لى كلام مش فاهمه

يا ابنى الامان...ده اول متطلب من متطلبات الحياة الادمية السوية
حممم..نعم هو حضرتك بتكلمنى انا ..يعنى هو ده معلومة ولا سؤال؟؟

معلومة ايه وسؤال ايه.....انت يا ابنى اهبل ولا بتستهبل؟؟
لاكده ولاكده..بس بجد مش فاهم


ويا ترى عاوز تفهم؟؟؟ولا انت مرتاح كده؟
بصراحه مكسوف اقول لك
لا قول..ما تتكسفش..اصل انا بجد عاوز افهم
شفت حضرتك الفرق...انت عاوز تفهم ...لكن انا مش عاوز
يعنى عاوز تقول انك ...مرتاح كده..؟


بصراحه اكتر..ايوه ايوه...انا مرتاح كده..انا مبسوط كده
يا ابنى انت كده فى غيبوبة..انت تايه.. الامان ده ابسط حقوقك

تاااانى هتقول لى امان.. وحقوق..وحياه آدميه..ومشاعر انسانية..واستقرار ..وطموح.............وامل فى بكرة.................وحلم..............ومستقبل

ياااااه...ما انت فاهم اهة امال بتنكر لية؟؟
انا مش بنكر انا بستنكر
انا فاهم الامان ....بس مش حاسسة....لانى لو حسيتة هطالب باللى بعدة...
وماله ....طالب...من حقك

ما هما علشان فاهمين كويس قوى دة...عمرهم ما هيخلونا نحس بية...عشان يفضل هو اقصى امنياتنا


هما مين اللىمش عاوزينكم.......ومش هيخليكم.....؟؟
شششششششششششششششش

خلاص خدوا موقف ...اعملوا حاجة
موقف؟؟حاجة؟؟ هوحضرتك تقصد اية؟؟؟؟ الا هو حضرتك ما قولتليش انت اللى منين؟؟

Wednesday, August 15, 2007

ازف اليكم النبا التالى

مساء الخير يا حلوين.........يا مأطأطين........يا مسكرين ........ياجميلين
النهاردة يا ولاد هتكلم معاكم فى موضوع ما يخصكوش خالص..تماما البتة....بس يخصنى وبشدة وبعنف ويهمنى اهمية قصوى.......فالفاضى يتفضل منورنا والمشغول الله يعينة وهندعى لة......ومنورنا برضة..وفى قول آخر برضك....هك هك هك .........طبعا زهقتوا م المقدمة....نخش فى الموضوع



احب ازف اليكم هذا النبأ الهااااام جدا .......امبارح كان عيد جوازى العاشر.....تتصورا....عشر سنين يا ولاد...اية اللطافة دى...ما طلع الجواز حاجة سهلة اهة...دى وصفة سهلة دى وصفة هايلة.....وبعدين عاوزة اقول لكم مافيش ابسط من كدة....اية يعنى كام يوم عكننة كل اسبوع ,,,قصدىكل شهر......واية يعنى خناقة كل يوم يييييييه قصدى كل شهر برضه.......يا جماعة الخلاف فى الرأى لا يفسد للود قضية.....وبعدين يعنى مجموع فترات الخلاف دى كلها تعمل لها حتة بكام يعنى......يعنى هنقول 7 و5 ومعانا الواحد من اصل عشرة .....طيب سهلة خالص ......يعنى لو عرفت تتحصل على عشر شهور صافى من غير مناور ولا بروزات...فى عشر سنين يبقى كتر خير الدنيا


بجد يا جماعة نتكلم بجد بس اللى مش متجوزين يطلعوا برة عشان ما نشيلش ذنبهم...قصدى عشان هنتكلم كلام كبار.....طبعا كلة هيقعد ويبرق عنية.........فهمتوا غلط يا.....قصدى كلام كبار وعاقلين..
دلوقتى اية مشكلة الجواز ...عند المتجوزين مش اللى ناويين عشان مانخشش فى شقة وشبكة ومهر وكلام فاضى من دة.....
احنا خلينا فى اللى اتنيلوا ....قصدى اتجوزوا بالفعل... نفسى اعرف اية المشكلة سواء حريمى او رجالى....بس بموضوعية ياجماعة يعنى ما تجيش واحدة تقولى شغل البيت..لا العيال والجرى وراهم طول النهار واسكت يا واد واكتمى يا بت.....ولا المطبخ ما بيخلصش ابدا هو انا اية قاعدة فى معسكر.......ولا تشطيب الحوض والحلل وخفة دمها........ولا تفترى ع الراجل وتقول دة ما بيقوليش كام حب ...دة ما بيفسحنيش لوحدنا ابدا....دة عمرة ما دخل عليا بهدية(الشر برة وبعيد عن السامعين


يجى بقة راجل سطحى...وغير موضوعى يقولك شكلها اتغير لأ تخنت لا مااعرفش احولت......لا البيت مبهدل لا العيال عاملة دوشة...لا والتفاهة كلها بقة لما يقولك...المصاريف لا المدارس....لا ما اعرفش الدروس الخصوصية... المصايف المشاتى.....مش عارف اخرج مع اصحابى.... لأ اكل امى وحشنى اصل امى كانت بتعمل وبتسوى....وفى الحالة دى انصحك عزيزتى بهاند باج صغنونة ...ولا اقولك كيس اسود من بتاع ال...ولمى لة فيى حاجتة وابقى خلى ام......تربى لة العيال ......وعشان نقول كلمة حق انت كمان عزيزى الزوج.....تقولك بابا كان بيعمل بابا كان بيجيب....نفس الرول اللى احنا لسة قاطعين منة كيس حالا وخليها هى تلم حاجتها لان انت عارف الستات ليها رفايع كتير.......وخلى بابا بتاعها يساعد ماما بتاعتة ويربوا العيال


ارجع واقول بجد والله انا سعيدة جدا وحاسة انى عملت انجاز...عشر سنين جواز...يا جمالة...مع ان انا فاكرة ان اخويا يوم فرحى قال لخطيبى على اعتبار ما قد كان...انا مديك حاجة...ولا كلمة..وبعدين ضمان 3 سنين صيانة وقطع غيار....بس الحمد لله ما كلفتهمش من يومها كدة ولا كدة...لسة زيرو وبحالة الفابريقة...
بس بجد بجد الا يعنى هو كدة تبقى التجربة نجحت ولا الكلام دة بعد كام سنة بالظبط افيدونا افادكم الله....وعقبال عندكم...

Thursday, August 9, 2007

حمى..............الحب



ضربات متتالية وسريعة فى القلب ...بل وعنيفة...ارتعاشة فى الاطراف..مع ميل للبرودة...جفاف فى الحلق...حرارة منبعثة من كل اجزاء الجسم...عرق يغزو الجسم بشكل مفاجىء....دوخة شدييييييدة....................

تلك هى الاعراض التى تشعر بها...ولكنها لا تشرحها لطبيب..بل تلك هى المشاعر التى تختلجها عندما تراه.....وهى تعرف جيدا ماهية هذة المشاعر..واسبابها
نعم...فهى تحبه....تحبه من اعماق قلبها..من صميم فؤادها..ومن كل خلجات ومسام جسدها.....
فهناك سببان لاثالث لهما يتسببان فى هذة الاعراض..اوالمشاعر ...الحمى ...والحب وهى محمومة بحبة....وهذا هو النوع الوحيد من الحمى الذى لا يتمنى المرء ان يشفى منة...فمعاناتة به الذ من الذ المشاعر الدنيوية الاخرى..فهذا هو العسل المر الذى لا غنى عنه.....فيالا وافر حظ من استشعر هذة المشاعر....ويالا قلة حظ من لم يستشعرها......ويالا غبااااااء وضيق افق من وجدها امامه...وتنحى عنها


انه.....الحب

Tuesday, August 7, 2007

الا هو يعنى اية تااااج؟؟




أسم مدونتك؟

ولكم كل الحب

لماذا أخترته ..وما هى نيتك من وراء أختياره؟

عشان بجد مش جوايا غير كل الحب..ونيتى اكون مخلصة واتكلم من قلبى..وبس

هل فكرت فى أغلاق مدونتك ؟ولماذا؟

الحقيقة..لسة..مش لما افتحها الاول ابقى اقفلها

اصورتك فى المدونه و رمزيتها؟؟

بالنسبة لاى صورة حضرتك؟

لما دخلت عالم التدوين من الأساس؟

حسيت انة باب اقدر اعبر من خلالة عن اللى جوايا واتواصل مع الناس بشكل حقيقى من غير ما نعرف بعض ..فنكون اوضح ومن غير زيف ولا مجاملات

جمله قيلت لك فى وصف مدونتك؟

الحقيقة لسة مافيش حد شرفنى باى وصف من اى نوع...شفتى الغلب

التعليقات بالنسبه لك..واهميتها؟

مهمة جدا طبعا..ما هو دة التواصل..امال انا بقول اية من الصبح

أحلى بوست كتبته....ضع اللنك ثم أذكر لماذا؟

يا ريت تقولى لى انتى

أفضل بوست قرأته ؟وضع اللنك؟

كتير ما اقدرش اميز..صعب

أفضل مدونه قرأتها؟

اية السخافة دى انتى هتزعلى الناس منى من قبل ما يعرفونى

حد قل أدبه فى التعليق أيه رد فعلك؟

اما ل هما عملوا ديليت لية

أسواء مدونه؟

لم تصادفنى بعد

أسواء بوست أسواء مدونه؟

هو اللى هنعيدة هنزيدة ولا اية

هيحصل أيه لاميلك لما تموتى؟؟

اكيد هتموت معايا

أديتى الباسوورد لحد قبل كده؟

ايون

كانت أيه طبيعه علاقتك بيه؟

جوزى وعهد اللة يا باشا

أسمك؟

اسم النبى حارسك وضامنك

المشهور بيه وسط أصحابك؟

اسالى نفسك

عمرك؟

يا لطافة..اية الخفة دى كلها...عايزة تضحكى عليا عشان اقولك ان انا عندى خماشر تمناشر سنة..ومتجوزة ومخلفة اية ؟فى مانع..مش بقول لك اهم حاجة الصراحة..والكلام من القلب...لا بجد تقدرى تقولى احساسى بالعمر متوقف عند المرحلة دى

برجك؟

يالا زى بعضة..ادينا بنعرف بعض بين الميزان والعقرب..احسن ناس

دراستك؟؟مجالك؟؟

دراستك وفهمناها وهى الادب..بس مجالك اللى هو اية حضرتك؟

شخصيتك نوعها ايه؟

تقدرى تقولى اجتماعية ومنطوية شوية..هادية بس عصبية قوى بس بالى طويل..مرحة قوى واموت فى الهزار بس يا سواد السواد لما بنكد...متواضعة قوى والاطة الدنيا فيا....حنينة اوى ورومانسية موت بس ما ليش فى الكلام المزوق والمجاملات الفارغة...طبعا اللى هيقرا الكلام دة مش هيدخل البلوج تانى وهيفتكرونى لاسعة ..بس والله العظيم كلة بجد ومش هزار..مش مولودة بين برجين ؟؟عاوزين ايه طيب

السفر بالنسبه لك؟

كنت بموت فيه..دلوقتى بعمل له الف حسا وبيوترنى وما انامش قبلها واقول يا رب يتلغى ..ووش من دة يعنى

وقت فراغك بتعملى ايه؟

لو لقيت طبعا..القراءة..عمل الحلويات..اكلم صحباتى..واستمتع بالوحدة مع مج نسكافية..ويااااةوجون وجون وجون

المود بتاعك؟

ساعة تروح وساعة تيجى

الأكله المفضله؟

كلة جميل وزى الفل وربنا يديمها نعمة ويحفظها من الزوال

الصفات التى أخذتها من بابا؟

الحنية..ونسيان القسية بسرعة

الصفات التى أخذتها من ماما؟

اعتمد على نفسى ..ولما احط فى دماغى حاجة لازم اعملها ..بمشيئة الله اولا واخيرا

أكتر ست حاجات بكرهها؟

ستة بس..يالا ماشى 1-الشيطان..2-اسرائيل..3-امريكا..4- اللىبيتعمل فينا واحنا فى بلدنا..5-القهر الذل القسوة القلب الجامد الظلم جرح المشاعر الكبر بكسر الكا ف ...الخ الخ الخ

أكتر ست حاجات بحبها؟

ربنا والرسول والجنة والرضا وراحة البال والصحة والكلمة الحلوة والامان وحضن اولادى ورضا زوجى

الشغل بالنسبه لك؟

مهم جداااا..بالنسبة لى ولغيرى ..الشغل بيثقل الشخصية وبيزود اعتمادها على نفسها وثقتها فى نفسها وبيزيدها خبرة

الأنترنت بالنسبه لك؟

شىء ممتع ومفيد ومسلى وكفاية انة سمح لنا بالتواصل الجميل دة.

أمرره لمين؟؟

امررة لمين يا ستى امررة لمين يا ستى..ولا ستك الا انا طبعا...كيكا ع العالى......اخت ساكايار...ساكايار ولو ينفع امررة لك تانى يا قمر امررة والنعمة..هو انا ليا اعز منك..يعنى هو انا همررة بفلوس...هك هك هك


Sunday, August 5, 2007

نقطة نظام يا جماعة


نداء الى اهالى الدقهلية الكرام
يا جماعة مش كدة..يا جماعة شوية نظام..بطلوا استهتار شوية سيرتكم بقت على كل لسان ..الواحد مش عارف يوشى ورة(يورى وشة..للناس ازاى..يا جماعة مش اى حاجة تطلع فى دماغكم تعملوها..
مش ممكن كم الامبلاة بتاعتكم دى ..الراجل اللى هوة المحافظ يعنى حط صوابعة العشرة منكم فى الشق..وصل بيكم الاستهتار انكم فى الجو الحر دة وفى عز النار دى تستحموا كل يوم كل يوم يا بجاحتكم ..دة مش بعيد تكونوا بتستحموا كمان اكتر من مرة..ماهو مال سايب.....................
الراجل اللى هو المحافظ برضة..بيستجير منكم فى الصحف القومية وصحف المعارضة..وبيقول ان كثرة الاستحمام واليعوذ باللة هى السبب فى مشاكل المياة فى الاقاليم..يعنى اقول اية اقول اية حسبى اللة ونعم الوكيل.......فيكم طبعا امال فى مين يعنى؟ماهو لو فية شوية احساس بالمسئولية..منكم برضةكنتم نظمتم الموضوع وجدولتم مواعيد الحمام مع الجيران وكل عمارة محترمة تكتب جدولها فى مدخل العمارة...
يعنى مثلا م\ علاء...من9الى9,7 الصبح
مدام م\علاء من 9الى 9,7 بس باليل ,,,ايوة ماهيا العملية مش سايبة مش سبهللة...احسن نفس الشقة فى نفس العقار تستخدم المياة اكثر من 7 دقائق ...ايون يعنى اللى يستحمى الصبح اخوة يخلى عند اهلة دم ويستحمى باليل...ودة طبعا مش كل يوم الجداول دى يا ولاد هتكون شهرية...ايون...حافظوا على نظافة مدينتكم ....ومش مهم انتوا....
جتكم القرف...ماليتوا البلد...
ودمتم لنا..ذلا....قصدى... ذخرا


Sunday, July 22, 2007

مبروك...انت ناضج


تغيرت المشاعر كثيرا..تغيرت..تبدلت..قلت..تقلصت.....ربما..ولكنها كلها مرادفات لمشاعر واحده..مشاعر فاتره..باهتة غير محددة الملامح..غير متوهجة..تعكس الوان مشوشة..نعم لذا فقد تغيرت تبدلت المشاعر..لم تعد تزيد لم تعد تنمو..ولكنى استطيع القول انها نضجت؟؟..نعم..انها مشاعر النضوج..نعم هكذا يطلقون عليها مشاعر النضوج...فكلما نضجت المشاعر ...فترت..وكلما نضجت الاحاسيس ..كلما قل توهجها..بل وصارت معتمة.نكاد لا نراها ولا نستشعرها....
فكلما احسست بمشاعر لا تستطيع تصنيفها فى درجات الحب...من اعجاب.. وحب..وتعلق..وعشق..ووجد..وولة...والخ الخ الخ..ولا كلام فاضى من دة خالص..عندما تجد نفسك متورط فى هذا النوع من المشاكل...اقصد المشاعر..ولا تجد وصفا او توظيفا او اى مشاعر من اصله ...يعنى مش حاسس باى حاجة خالص...تسمح لى افرحك واقول لك مبروك....انت ناضج
(ويا ريتك فضلت نص سوا..هاهاها..هم يضحك ..وهم))


Monday, July 16, 2007

تصدقوا......او ما تصدقوش انتوا احرار

تصدقوا.. او زى ما قلت لكم ما تصدقوش..انتوا احرار ...ما هى دى الحاجه الوحيده اللى احنا احرار فيها يا نصدق يا ما نصدقش بس المهم بقى ان احنا ما نقولش .. واخدين بالكم ازاى ... ااااايوة كدة المهم اية ..شششششش
نرجع لموضوعنا.تصدقوا ان حتى الاحلام فىبلدنا ليها ناسها ايوة والله ليها ناسها يعنى المفروض قبل ما نحلم نفكر الاول ممكن الحلم دة يبقى حقيقة ويبقى معانا حتى واحنا مفتحين ولا هيفضل واحنا مغمضين وبس..طبعا هما بيحاولوا يفهمونا ان الاحلام باليل بس.. بس انا واعوذ بالله من كلمه انا ..بشوف ان الحلم حلاوته ومعناه الحقيقى وهو بيتحقق.....بس هما ليه بيحاولوا دايما يكسروا الاحلام جوانا..طبعا بنعمل مش واخدين بالنا وبنكمل ..بس مش نافع ...طبعا انتوا فى منتهى العجب من اللى بقوله ومش مصدقين اللى بقوله ومش حاسيين بيه.....واضح واضح....ونفسكم وهتموتوا تعرفوا ولو مثال واحد للى بقولة..يعنى عاوزين توقعونى فى الغلط واتكلم عن احلامنا المسروقه فى العيشة النضيفة فى اماكن بعيد الشر نضيفه...زى اخوانا البعده...وفى اشغال محترمه وفى مستقبل هههه لاولادنا واولادهم ده يعنى لو ربنا كرمهم واتجوزوا وكرمهم اوىىىى وعرفوا يخلفوا...الا ولامؤاخذه فى السؤال .. هى المدن الجديدة اللى لامؤاخذه فى الصحرا..هى لامؤاخذه معمولة لمين ..انا عارفه ان ده تبجح وجرأه وقله حيا منى انى اسأل سؤال زى ده بس من عشمى ...اصل انا لقيت ان الشق.... قصدى الشقه ال50 متر عقبال امالتكم عشان نندفن...قصدى عشان نسكن فيها بمبلغ مكون من 6 ارقام فقلت اقول لكم واهى فرصة يا اولاد نبقى جنب بعض..........يعنى هيبقى لا دنيا ولا اخرة....بسم اللة معايا فى البيوت اللى فى الطبق....ها صدقتوا ولا لسة

Friday, July 13, 2007

اول كلامى

حبيت يكون اول كلامى معاكم ...شعر


لن ابيع العمر
لا تشعرينى اننى أخطأت
حين اتيت التمس الامان
فوجدت خلف الجنه الخضراء
انقاضا و اطلالا وخوفا
وامتهان
لا تشعرينى
أننى صليت فى بيت ردىء
ثم أخطأت المكان
ماعدت املك من زمانى
غير ما عشنا معا
لا تشعرينى اننى ما كنت شيئا
غير تأكيد لذاتك
انى احبك
آه ما اقسى النهايه
الحب عندى كعبه
والحب بين يديك ياعمرى..هواية
الله يعلم اننى يوما وهبتك كل ما عندى
وصدقت الحكاية
ان كنت عندك ليلة
قد كنت فى عمرى النهاية..والبداية
فاروق جويده
لن ابيع العمر