Sunday, August 5, 2007

نقطة نظام يا جماعة


نداء الى اهالى الدقهلية الكرام
يا جماعة مش كدة..يا جماعة شوية نظام..بطلوا استهتار شوية سيرتكم بقت على كل لسان ..الواحد مش عارف يوشى ورة(يورى وشة..للناس ازاى..يا جماعة مش اى حاجة تطلع فى دماغكم تعملوها..
مش ممكن كم الامبلاة بتاعتكم دى ..الراجل اللى هوة المحافظ يعنى حط صوابعة العشرة منكم فى الشق..وصل بيكم الاستهتار انكم فى الجو الحر دة وفى عز النار دى تستحموا كل يوم كل يوم يا بجاحتكم ..دة مش بعيد تكونوا بتستحموا كمان اكتر من مرة..ماهو مال سايب.....................
الراجل اللى هو المحافظ برضة..بيستجير منكم فى الصحف القومية وصحف المعارضة..وبيقول ان كثرة الاستحمام واليعوذ باللة هى السبب فى مشاكل المياة فى الاقاليم..يعنى اقول اية اقول اية حسبى اللة ونعم الوكيل.......فيكم طبعا امال فى مين يعنى؟ماهو لو فية شوية احساس بالمسئولية..منكم برضةكنتم نظمتم الموضوع وجدولتم مواعيد الحمام مع الجيران وكل عمارة محترمة تكتب جدولها فى مدخل العمارة...
يعنى مثلا م\ علاء...من9الى9,7 الصبح
مدام م\علاء من 9الى 9,7 بس باليل ,,,ايوة ماهيا العملية مش سايبة مش سبهللة...احسن نفس الشقة فى نفس العقار تستخدم المياة اكثر من 7 دقائق ...ايون يعنى اللى يستحمى الصبح اخوة يخلى عند اهلة دم ويستحمى باليل...ودة طبعا مش كل يوم الجداول دى يا ولاد هتكون شهرية...ايون...حافظوا على نظافة مدينتكم ....ومش مهم انتوا....
جتكم القرف...ماليتوا البلد...
ودمتم لنا..ذلا....قصدى... ذخرا


10 comments:

Unknown said...

يا سيتى انتى الغلطانة ما تسيبك من الدقهلية الفلاحين دول و تعالى اسكنى عندنا هنا ف المدن الجديدة انا مثلا قاعد ف الحى الخامس عندى فيلا صغننة ف كومبوند تحفة ،ولمل ازهق منه باروح اقعد ف الشقة الدوبلكس بتاعتى اللى ف 6 أكتوبر و فسحتىكلها ف دريم عند اصحابى كلهم هناك،وبلا وجع قلب و لا جداول

Unknown said...

اه صحيح نسيت اقول لك حلوة صورة الحمام دى، لذيذ بس عادى يعنى ، يالا انسف حمامك القديم ده و هاتى الجديد

sa7arkash said...

اللى اداك يدينا ياعم...وبعدين قل التجمع الخامس ولا تقل الحى الخامس...وقل فيلا دوبلكس ولا تقل شقة دوبلكس....وبعدين ننسف يا عم ماننسفش لية..بس على راى المثل...اطبخى يا جارية.....كلف يا سييييييدىىىىى

فى القلب said...

والنبى يا سو سو دى فكره عسل
لو سمحتى أحجزيلى فى معاد واحده ونص بليل
عين بتغمز
باىىىىى أصل مزنوقه وعايزه أخش الحمام
ويجعله عامر

sa7arkash said...

اوشا الجميلة...وادى اول حجز معانا ...مدام د-....
الساعة 1.30 ويا ترى حضرتك لوحدك ولا معاكى حد؟؟.... ....

Doaa Ebrahim Aaql said...

هههه
البوست جميل اوى اوى
مبطلتش ضحك عليه
انتى عسولة

تحياتى

sa7arkash said...

اشكرك بشدة على زوقك وخلت عندك لقيت البلوج بتاعك اكتر من رائع وحاولت اسيب لك اكتر من كمنت بس مش عارفة لية لم يقبل

القلم السكندري said...

يا سيدتي ولا يهمك

سيبك من الدقهلية كلها وشرفينا في اسكندرية

احنا الحمد لله الاستحمام عندنا اوبن بوفيه

ولو المية قاطعة البحر مش هيقطع


مشكورة علي البلوج الظريف ده

sa7arkash said...

القلم السكندرى ..يا سيدى انت اللى مشكور على الزيارة الجميلة دى ..وبعدين انت بتقول فيها احنا بنموت فى الاسكندرية..وكل شوية ناطين هناك..صيف شتا

القلم السكندري said...

انتو تنورو اسكندرية