Saturday, November 10, 2007

خريف..شتا..ربيع..صيف


دى المراحل اللى بتمر بيها السنة......طبعا..كل سنة

وده ترتيبهم الزمن..وما ينفعش فصل يسبق التانى...ولا فصل يلغى التانى...........لوبصينا شوية فى معانى الفصول دى..وحاولنا نطبقها على حياتنا....هنلاقى الآتى ودة طبعا من منظورى الخاص...ولكل منا منظور خاص به .

.

.يعنى انا شايفة مثلا ان العمر بيبدأ بالربيع... وهى دى اجمل فترة الطفولة البراءة الانطلاق عدم تحمل المسؤلية الضحكة من القلب العيون الممتلئة تفاؤل......ربيع بجد


طيب وبعد كدة...انا شايفة انه الصيف...ودى ما بعد الطفولة وهى المراهقة وبدايات الشباب...وشايفة ان الصيف شبهها قوى...حر يتماشى مع حريتهم ورغبتهم فى كسر القيود.....خروج سهر فسح وحب وصداقة...ودى كل متطلباتهم


اما بعد كدة فحسيت بحيرة..الخريف ولا الشتا بس انا شفت انة الشتا...وهو نهايات الشباب والكهولة...تحس فيها بالبرودة واحتياجك للدفء دفء حقيقى دفءالحب الاحتواء الاستقرار دفء العشرة الحلوة دفء جنى ثمار المرحلة اللى فاتت......مرحلة بنكن فيهاشوية زى الشتا مش ملهوفين اوى على الخروج حلو الدفا والسرير والبطانية حلوة القراءة بس الامر ما يستغناش فسحة حلوة كل فترة كدة خروجةلطيفة شوية عواطف تدفى الجو


اما الخريف...فأنا شايفاة ما بعد ذلك ورق بيتساقط شجر بيذبل...وبرضة شعر وأسنان بيتساقطو ووجة بيذبل جو بتزحف فية الكآبة والانقباض على سائر المشاعر دون سبب ..كذلك تجاعيد فى المشاعر تجاعيد فى الداخل والخارج ....وساعتها بنكن رغما عنا وليس بارادتنا


وزى ما قلت قبل كدة...بين الفصول مافيش فصل بيسبق فصل ولا بيلغية

بس انا شايفة ان فصولنا احنا بتسبق بعض وبتلغى بعض وبتتجاوز بعض...يعنى مش الكل عاش ربيع كامل....ولا عاش الصيف زى ما كان نفسة....وفى اللى دمج الربيع والصيف ..وعاش شتا اطول...وفينااللى حاسس بالخريف وهو فى عز الصيف...وفينا اللى فى الخريف....وقلبة ومشاعرة ربيع وصيف....دة رأى مش عارفة رأيكم اية

41 comments:

عصفور المدينة said...

السلام عليكم

رااااااائعة
وفعلا وأنا باقرأ كنت عايز اعلق اقول البعض بتلاقي الفصول عنده متلخبطة عن الترتيب ده وممكن لاغي بعض الفصول

وممكن تلاقي في عز الصيف شوية مطر أو عواصف رملية في عز الشتاء

الخاطرة د جميلة جدا وبعدين ممكن تتربط باللبس كمان ان الواحد بيلبس اللبس المناسب للمرحلة يعني يتصرف ويعيش سنه
:)
وسبحان الله فيه توارد خواطر حصل لأني كاتب موضوع شبيه

احساس لسه حى said...

عزيزتى
طبعا المراحل دى مش متقسمه على العمر لان ممكن ايام فى الخريف تكون كربيع وايام فى الصيف يحصل فيها زوابع كالخريف
بس عارفه لو نعيش حالة الرضا هنعرف نعيش الفرح فى كل الفصول والحزن برضوا فى كل الفصول اصل الموضوع مش عمر بس الوضوع احساس وده اهم من العمر
تحياتى يا جميل
سلام

sa7arkash said...

عصفور المدينة

يادى النور يادى النور

عشان تعرف انى ممكن اقرا افكارك
هه هه هه هه هه
هى ممكن تطبق على اللبس والمشاعر والعلاقات الانسانية لان انا شايفة ان حياتنا ما هى الافصول متعاقبة


بس الشاطر اللى يقدر يعيش كل فترة على قد ما يقدر......وفى الاخر كلة نصيب

sa7arkash said...

احساس لسة حى

ما اختلفناش
دة نفس المغزى...والرضا مهم طبعا لتجاوز اى مشاعر سلبية
نورتنى
سلام

Doaa Ebrahim Aaql said...

عجبنى اوووى تشبيهك
لسنوات العمر
بفصول السنة
بحس ساعات انه صح
وبينطبق مع بعض الناس فعلا

بس عارفه بالنسبة لى
ساعات احس
ان كل يوم بمر بيه فصل مختلف
وساعات الخريف عندى يكون قبل الربيع
يعنى انا شبه السنه الملخبطه
وبتمر عليا الفصول باستمرار
وتتابع واختلاف


بس وجهة نظرك بجد عجبتنى أوووى

سلام ياقمر

sa7arkash said...

دودو الشقية

منورانى يا جميل

ويسعدنى دايما اعرف رأيك

وحلوة قوى لخبطة الفصول اللى عندك..ودى حالة صحية..بس المهم ان المشاعر السلبية لكل مرحلة ما تاخدش منك كتير

ودايما صيف وربيع يا جميل

فى القلب said...

جميله و رائعه الفكره دى أوى أوى يا سوسو
و فعلا يا حياتى
حياتنا كلنا فصول
و لكن الخريف بصراحه ألى الواحد خايف منه
ربنا يحسن خواتيم أعملنا

rack-yourminds said...

راااااائع هذا البوست


وعجبني كتير نهاية البوست اللي حضرتك بتقولي فيه

"
بس انا شايفة ان فصولنا احنا بتسبق بعض وبتلغى بعض وبتتجاوز بعض...يعنى مش الكل عاش ربيع كامل....ولا عاش الصيف زى ما كان نفسة....وفى اللى دمج الربيع والصيف ..وعاش شتا اطول...وفينااللى حاسس بالخريف وهو فى عز الصيف...وفينا اللى فى الخريف....وقلبة ومشاعرة ربيع وصيف...."

بجد بوست في منتهي الروعه انتي بقي فيلسوفه

تسلم ايدك

تحياتي لكي

Anonymous said...

تحليل جميل جدا وبسيط

تخيلت معه وكأنى بين الشتاء والخريف

:)))

القلم السكندري said...

ياااه

رأينا أنها خاطرة رائعة جدا

من زمان مقرأتش ليكي بوست

بصراحة وصف جميل جدا

وما اجمل دفئ الشتاء

وأروع حبات المطر تتساقط علي القلوب

فتهتز وتنبت كل حب



دمت بكل خير أختي العزيزة



تحياتي

sa7arkash said...

فى القلب

انت فين يا سكر والخريف فين

وخلينى ادعى معكى

اللهم احسن خواتيم أعمالنا..
واجعل خير عمرى آخرة...وخير أيامى يوم ألقاك فية...آمين آمين آمين

sa7arkash said...

rack-yourminds


ربنا يخليك...دة من زوقك

بعض ما عندكم يا فندم

أخجلتم تواضعنا...واسعدتنى بمرورك طبعا عشان قلت لى كلمتين حلوين
:):):)

sa7arkash said...

sherif

أشكرك على المرور

تخيلت نفسك بين الشتا والخريف......ربنا يطول فى عمرك وتعيش احلى شتا واحلى خريف انت وزوجتك الحبيبة

ونقعد سوا على كافية المدونين ونفتكر الذى مضى
:):)

sa7arkash said...

القلم السكندرى

انت فينك يا عم

اية الاختفاء الطويل دة...عاوزين نقرأ لك حاجة

ومرسى على ذوقك وكلامك الجميل

وحلو قوى تعبيرك عن الشتا والمطر والحب...اكتر من رااائع

منورنى دايما

المهـ إلي الله ـاجر said...

خاطرتك ممتازة وتحوي بعداً نفسياً ذكيا تناولتيه بمنتهي البساطة

في رأيي ان اختلاف ترتيب الفصول ناتج عن التغيرات المتعلقة بكل شخص . وهناك ارادة ذاتية قد تساهم في ذلك

وكم من اناس يعيشون حياة الصيف والشتاء يعصف بداخلهم


شرفت بمروري عندك

جزاك الله خيرا

truelove said...

فعلا ياغالية حياتنا فصول بس هقولك على فكرة احنا برضه الي ممكن نعمل الفصول دي بيدناوالله بيدنا نعيشفي الربيع في عز الخريف حياتنا احنا الي بنصنعها والا مكنش ايليا قال " كن جميلا ترى الوجود جميلا "

Esmat said...

تحياتى لكى
تحليل حلو لكلا منا فصوله الخاصة
إما بتكون بسبب إختياراته
او الظروف بتحتم عليه انه يعيش
فصول مش بإختياره
وممكن تلاقى الفصول كلها فوق دماغنا
فى يوم واحد مثلا
يعنى احنا ممكن نقول انها مقسمة
حسب إحساسنا مش مراحل عمرنا
بجد فلسفة عميقة اشكرك عليها
تحياتى لكى

Coca said...

رائع البوست دا
ولوني شايفه ان كل سنه بتمر في حياتنا بيعدي عليها فينا كل الفصول
وحياه الانسان دايما في تغير اكثر من فصلول السنه نفسها
لكن تقسيمك للحياه بشكل عام علي الفصلول رائع جدا وصحيحي بشكل كبير جدا

sa7arkash said...

المهاجر الى الله

اشكرك على المرور

وانا معاك ان الاحساس بالفصول بيعتمد على الانسان نفسة واستعدادة

تحياتى وسعيدة بتشريفك

sa7arkash said...

truelove
ازيك يا قمرة واحشانى
وعندك حق فى اللى بتقولية

كن جميلا ترى الوجود جميلا ونورتينى يا سكر

sa7arkash said...

esmat

هى فعلا كدة اختيارات الواحد ...وظروفة ايضا هما اللى بيتحكموا فى الواحد وفصول حياتة

اشكرك
وسعيدة بمرورك

sa7arkash said...

coca

اول مرةتشرفينى بالزيارة

اشكرك على المرور...وعلى المشاركة بالراى الجميل

Coca said...

اين الجديد يا جميله

اتمني تكوني بخير
تحياتي

Doaa Ebrahim Aaql said...

الجميل مكسل ليه


طمنينى عليكى يا قمر

Anonymous said...

احيكى على تحليلك الرائع بجد لمراحل عمر الانسان
بس احيانا ولظروف نفسيه او معيشيه بيعيش الانسان الفصول مع بعض فى وقت واحد

sa7arkash said...

coca

ما اتحرمش من سؤالك يا جميل

ولى عودة قريبة ان شاء الله

sa7arkash said...

دودو الجميلة

لاكسل ولا حاجة..شوية مشغوليات بس بالاولاد...وما اتحرمش منك يا سكر

وطمنينى انتى عليكى

sa7arkash said...

رئيس جمهورية نفسى

اولا دعنى احييك على اسمك اكثر من رائع...واشكرك على الزيارة والمشاركة

وفعلا انا معاك كتير الظروف بتعيشنا الفصول بشكل مدمج...واضح ان دى ظروف جيل....واشكرك مرة تانية

نورتنى

horas said...

بس انا شايفة ان فصولنا احنا بتسبق بعض وبتلغى بعض وبتتجاوز بعض...يعنى مش الكل عاش ربيع كامل....ولا عاش الصيف زى ما كان نفسة....وفى اللى دمج الربيع والصيف ..وعاش شتا اطول...وفينااللى حاسس بالخريف وهو فى عز الصيف...وفينا اللى فى الخريف....وقلبة ومشاعرة ربيع وصيف...



الصراحه لولا الفقرة دى
كان هيبقى البوست كلاسيكى اوى
طبعا انا رأيي غير كده خالص
بس المهم ان تناول الموضوع كويس
والفكرة حلوة

Unknown said...

مقابله رائعه بين فصول الارض
وفصول حياه الانسان
صدقتي فحياة الانسان مراحل وفصول
وما أن ينتهي خريف شخص حتى يبدا ربيع شخص أخر

momken said...

يمر العمر بفصول بها كل ما بالفصول
تشبيهك جميل
ايه يا بنتى الفلسفه دى كله
فعلا برضه الموهبه ليها دور

خيالك يخلى اى حد يقف قدامه عاجر
وموهبتك بتفرض نفسها
تحياتى

محمد على ..هي كده said...

اوقات بلخبط الفصول من غير ما نعرف ونحس


بس جميلة جدااا لما تبقى مرتبه

sakayar said...

هوه الكلام ده مين اللي كاتبه؟؟؟؟ ماشي يا سيدي ع الخواطر الجميلة
ههههههههه
طيب كنتو قولولنا نسافر من بدري علشان نقرا الحاجات دي ... ولا كنتو بتخبوها عننا هههههه
بجد جميلة جدن
بس أيًا كان الترتيب وأيًا كانت الفصول يبقى الحل في الانسان ... هوه صاحب الارادة يقدر يعيش نفسه في كل الفصول على إنها ربيع

Doaa Ebrahim Aaql said...

كل سنة وانتى طيبة يا سوسو

عيد سعيد يا قمر


سلامى ليكى يا جميلة

القلم السكندري said...

الأخت العزيزة سحر

كل عام وانتم بخير

افتقدكم عالم التدوين لفترة ليست بالقصيرة

وتركتم فراغا أيما فراغ لن يملؤه سوي عودة قلمكم المميز

لعل المانع خيرا

دمت بكل خر وأسرتك الكريمة

تحياتي

karim said...

تفسيرك للمراحل العمرية جميل و دقيق فى نفس الوقت .ولكنى اعتقد انت تلك الفصول تحدث عدة مرات فى اوقات متقاربة جدا فى نفس العام وليس فى مرحلة دون اخرى هناك حالات حب كالصيف و هجر و اشتياق للحب كالشتاء.

lebnania said...

hi
السلام عليكم ورحمته وبركاته
سبحان الله
ات متال الفصول الاربعاه دفئ متل الصيف وحنون متل جميل متل الربيع وغضباك متل الخريف وتفكيرك عقلينى متال الشتاء يعنى انت متل الفصول الاربعاءه جميل وجمالك عجيب وروعه اتمنى تفاهم الكلم لوماعرفت اعبرا انا
تمانياتى لك بالسعده دئمان
وشكرا
واتمنى تزورنى ويسعدن وجودك فى مدونت هون لبنانيه عنجدا

rack-yourminds said...

السلام عليكم

كل سنه وحضرتك طيبه وبصحه وبسلامه والاسره كلها يارب

مفيش جديد يعني عاوزين تكتبيلنا حاجه جديده

-------
تعليقك عندي كتير عجبني وفيه نظره فلسفيه باين حضرتك بتقري فلسفه كتير

وبعدين حضرتك دمك خفيف مين ده اللي يقدر ويقول تقيل

تحياتي وسلامي

احساس لسه حى said...

عزيزتى
انتى فيينك من مده كل سنه وانتى طيبة
عاوزك تشوفى اخر بوست عندى وتعلقى عليه بصراحه ووضوح للاهميه يا ريت
سلام

rack-yourminds said...

السلام عليكم

أولا :انا متشكر جدا جدا علي تعليقك الجميل في مدونتي ,حضرتك دايما تعليقاتك جميله جدا


ثانيا :حضرتك مش بتكتبي جديد ليه يا ريت تكتبيلنا موضوعات جديده

تحياتي وسلامي

طهقان said...

انت فين من زماااان
؟
هوا فصل الشتاء وقف لنوفمبر وبس؟
فين ديسمبر ويناير ؟


عووووودي يا هامييييس